شعر : محمود فتحي - مصر
احلملك
-------------
لما القمر يطلع
أشوف صورتك
ألاقي الريح .. رياح تباريح
تطير شعرك
ولون الفضة .. يتوضا
تصوصو في الفضا عصافير
أشم عبير .. وأتوضا
سيبيني مره أحلملك
وافسرلك بنات حورك
خيال نورك
وشمعدان مدموغ بفضه
وأزرعلك عيدان الدهب قمحك
وشوش الشمع تضحكلك
عيون الزهر تفتحلك
كما قطنك
سيبيني مره أرسملك
علي وش القمر فرحك
علي ورق الشجر .. ضحكك
ألاقي الفرح من شكلك
تمور النخل تشتاقلك
وموج البحر يفتح لك .. دراعاته
وحضن الرمل يرتاحلك.. سماحاته
مانا أصلا يامولاتي متيم بك
وم الاول بحبك
وم الآخر راسملك
علي وش الدره طرحك
وفارش م الندي حبات
وهمس بنات
وشوش جدات
طالقلك في الفضا نحلك
أدوق الحلو من حلوك
مانا نفسي لو تسمحي
أكون هزلك أكون لعبك
أكون كراسة في درسك
سطور تعبير
قراية طالعة من نصك
أميره جالسه علي عرشك
وانا عاشق وقلبي ولي
وإعراب الهوا نحوك
انا الزرقه وانا الخضره
والنسمة لما تطير شعرك
انا فكره .. في جماجم ذكري
انا فقهك
وحتة لحم من جسمك
حتة طين في تمثال
بقاله زمان علي نهرك
مانا أصلك وانا فصلك
وانا دربك وانا طرحك
طفولتي طالعة من شارعك
وآه لو تسمحيلي أفسر ف الهوي
حلمك ....
أميره قاعدة علي عرشك
------------------------------
نشرت هذه القصيدة بديوان (جغرافيا الاحلام) للشاعر / محمود فتحي - مصر
ليست هناك تعليقات:
إرسال تعليق