(فهمونا يا ناس). ١٥/فبراير٢٠١٧
***********************************
(الجزء الاول)
ايدين الخلق متكتفين
والهم ساكن ف الضلوع
هموم سلف علي هم دين
والحوجه زايده معاها جوع
وناس بتسأل طب منين
والعوزه ماليه العين دموع
ايدين الخلق متكتفين
والهم ساكن ف الضلوع
لا شغل فيه ولا مشغله
والقاعده ويا الهم طالت
طب ايه حلول المسأله
ولا اجابتها إستحالت
والفقر فينا بقي مشكله
كل الغلابه قلوبها دابت
تدعي وتنده يا معين
بقلب خالص وبخشوع
ايدين الخلق متكتفين
والهم ساكن ف الضلوع
طب نفسى اسألكم سؤال
وياريت تجاوبوني بصراحه
حد الكفاف صعب المنال
إمتى البشر ح يعيش ف راحه
ولأمتى راح نفضل بحال
لا فيه هنا ولا فيه ملاحه
والخلق دي ح تروح لفين
ياللي انتوا ماسكين القلوع
ايدين الخلق متكتفين
والهم ساكن ف الضلوع
اذاى بلدنا ياناس فقيره
وناس بتملك مليارات
من غير سبب ولا حتي سيره
جاتها منين دى المليونات
سؤال مخلي الراس ف حيره
طب حلوهالي وانا من سكات
ح خرس واعرفكم ما غيره
ولا انا علي يا ولاد ذوات
متكونش المهيه اللذين
بقت من الالوفات جموع
ايدين الخلق متكتفين
والهم ساكن ف الضلوع
دخله يا دوب الفين تلاته
عادي ذينا عيشته يا دوب
حياته روتينيه ببساطه
مقضى بالعافيه المطلوب
فجأه وبحبه وساطه
تلقاه منفخ للجيوب
وتبص له سكناه غتاته
ماشى وكأنه ما فيه عيوب
وفجأه اسمه بدون شماته
من بين المحابيس محسوب
واشمعني يا بتوع التموين
انتوا اللي قايدلكوا الشموع
ايدين الخلق متكتفين
والهم ساكن ف الضلوع
بقلم الشاعر/محمد الشاذلى
ليست هناك تعليقات:
إرسال تعليق